Towlennik # 296

This is an overview edition of this week's edition of RanG for students. The script appears below:

An seythen ma, Radyo an Gernewegva eth dhe Drenmogh rag Keskussulyans Skians. Yth eson ni ow klappya gans nebes an arethoryon an seythen ma. Skians veu synsys dhe’n bennskol dy’ Gwener degves warn ugens a vis Gwynngala ha dy’ Sadorn kynsa a vis Hedra. Prof Ken MacKinnon a arethas dhyn der Skype yn unn hwithra tiredh spyrysek a Gernow. Ev a viras orth an mappa ha hwilas henwyn tyller ha’n doronieth keffrys. Dr Alan Kent a viras orth tekst Tregear yn moy glew ha leverel bos a brys …byttegyns, ny wor meur a Gernewegoryon meur yn y gever. Yth esa aretha ynwedh gans John Gillingham yn kever hwithrans niver a bobel a garsa danvon fleghes dhe skol veythrin. Davydh Trethewey a gewsi war desten a vedhelweyth treylya… hag Esther Johns a dhiskwedhas dustuni war dhyski y’n nebes gisyow dihaval. Dy ‘Sadorn a dhallathas gans Siarl Ferdinand ow mires orth studh Kernewek y’n eur ma war-lergh UNESCO.
Yth esa Dr Jon Mills ow kewsel yn kever geryow kepar ha ‘dhe’ ‘orth’ ha ‘rag’ wosa verbow, ha kavos dustuni y’n tekstow. Prof Nicholas Williams a dhevnydhyas an tekstow ynwedh yn unn dhyski dihevelepterow ynter an fordhow a leverel an ger Sowsnek ‘when’ yn Kernewek. Ev a ynnias dhyn ni leverel ‘pan vo’ ha ‘pan wrylliv’ y’n le a ‘pan yw’ ha ‘pan wrav’. Linus Band a dhiskwedhas dhyn chartour koth a Vreten Vyghan gans nebes Kernewek ynno. Nena, Dr Ken George a dhismygas an dyffrans ynter sonyow ‘iw’ ‘yw’ ‘ew’ ‘u’ hag ‘uw’ dre leverel an lavar: “Piw yw a lew war-tu ha’n bluw?” Yth esa aretha a les ynwedh gans Elena Birmani ha Deborah Arbes. ** Lavar dhyn mars yw da genowgh an dowlennik ma… ha mires orth agan kanel nowydh der Youtube, henwys Pellwolok an Gernewegva.

(Meur ras Esme Tackley rag gwellhe ow FSS) #Cornish #Kernewek #Cornwall #language #languages #linguistics #celtic #Kernow #Speakcornish