Towlennik #298

Oct 20, 2016, 02:24 PM

Yth eson ni ow mos dhe Lys Kernow y’n dowlennik an seythen ma. Hwetegves a vis Hedra y feu synsys Dalva an Yeth ena. Kernewegoryon eth di yn unn waytya dyski pyth eus ow hwarvos gans an Akademi ha’n ragdresow y’n eur ma. Ottomma kaderyer an Akademi, Jori Ansell. “A-dhia mis Ebrel, re wrussyn ni assay bos usys gans an savla nowydh wosa deg bledhen a vos heb arghasans vyth oll dyworth an governans. My a vynn godhvos gras dhe Gonsel Kernow hag ervira mentena agan ran a’n arghasans yn despit dhe gildennans an governans ha herdhya pella an mater gans an governans nowydh heb sewena bys y’n jydh hedhyw. Ni a bes kesoberi gans an konsel dre vras gans hembrenkyas a’n yeth Kernewek, Mark Trevethan ha’n Akademi Kernewek a vynn godhvos gras dhodho ev ha’y ober diwysyk fest ha’y omrians dhe dhisplegyans a’n yeth.” Ev a gewsi dhyn a-dro dhe gudynnow gans an towl ober heb mona dhyworth an governans. Wosa an hwarvos, my a wrug keswel gans Mark Trevethan. Ev yw sodhek an taves dhe Gonsel Kernow. “Dell grysav vy, henn o kuntelles gwell ages an prys aral, an diwettha kuntelles yn mis Ebrel pan wrussyn ni klewes a-dro dhe’n gorthyp a-dhyworth an governans a-dro dhe’n arghans. Hedhyw o oll a-dro dhe’n ragdresow, fatel yllyn ni kesoberi ha moy posedhek hag yma meur a daklow ow hwarvos lemmyn yn Kernow gans an yeth ha leun a wovenek ov vy a’n pyth a yllyn ni gul lemmyn.” Mar mynnowgh mires orth Youtube, yma kanel nowydh henwys ‘Pellwolok an Gernewegva’. Gwydhyo veu gwrys dhe’n Dhalva ynwedh. Yth eson ni owth avisya diw dra aral an seythen ma: Lowender Peran ha’n Keskerdh erbynn Kernans. Lowender Peran a vydh synsys yn Tewynblustri 2a dhe 6ves mis Du. Degves warn ugens an mis ma y fydh keskerdh dhe Bons Polson erbynn towl an governans kesunya keverang Kernow ha Dewnans ha gul keverang Kernans. Lemmyn, goslowewgh orth an dowlen veur. Oll an gwella bys y’n nessa termyn.

#language #Cornish #Celtic #Cornwall #Kernow #Kernewek #linguist #bilingual