Towlennik #313 - Agan Lev

An seythen ma y’n dowlennik, goslowes a wren orth derivas Delia Brotherton . Yn medh hi: Yma lies hwarvos ow tos yn skon avel rann an dowlen Gool Kernewek Pennsans hag a les dres eghen a vo onan anedha mar po les down genowgh a-dro dhe Gernewek. Agan Lev - Keskows Kemenethek – An Devedhek rag Kernewek. Kesareth a dhur unn jydh restrys gans bagasow bodhek an yeth, owth oberi yn keskowethyans, rag dadhla breus an gemeneth a-dro dhe'n fordh yn-rag rag an yeth. Kenerthys yw kowsoryon, dyskoryon, skodhyoryon ha gweythresydhyon dhe synsi rann yn chons unnik dhe dhos war-barth ha displegya towl gweythres rag kemeneth an yeth. An kesareth a vydh synsys dhe wariva "The Acorn", Pennsans, dy'Sul 26ves a vis Hwevrer, 11eur myttinweyth bys dhe 3 eur dohajydhweyth. Synsys vydh y'n dowlen diskwedhyans a-dro dhe'n le mayth eson, sewys gans dadhlow ledys yn bagasow a-dro dhe'n krevderyow, gwanderyow, godrosow ha chonsyow. Esedhek finek a wra dri an neusennow war-barth ha mires orth an fordh yn-rag rag kemeneth an yeth. Nyns eus kost rag an jydh. Koffi, te ha sosten a vydh proviys. Rag ri gweres gans hemma, heweres via mar mynnowgh erghi le dre wiasva Eventbrite hag ena gwra hwithra orth "Agan Lev." “Meur ras”, a lever Delia. Lemmyn – goslowewgh orth an dowlen veur.