Towlennik 314 - Kyttrinyow flamm nowydh

Mars owgh hwi trigys yn Kernow West, martesen hwi re welas kyttrinyow nowydh. Flamm nowydh ha rudh yns ha gelwys yn Sowsnek, “The Tinner”, po An Stenor y’gan taves nyni. Yma lavar po ger y’n rannyeth Sowsnek a Gernow war geyn an kyttrin, kepar ha: “Cummas zon”. Kekeffrys ha henna, yma lavarow kevys a-ji dhe’n kyttrinyow yn Kernewek. Ottomma an nessa kowethas kyttrinyow dhe wul neppyth a’n par ma. Yma kyttrinyow yn Kernow Soth -Est hag Aberplymm gans Kernewek skrifys war aga horfow a-ves – gans puptra skrifys a-ji yn tiwyethek. Fest da yw gweles an kyttrinyow gans an lavar “Agas Kyttrin Leel” skrifys warnedha. Mars yw gwell genowgh usya an tren dhe Loundres y’n nos, yma Kernewek skrifys ena ynwedh. Dell welyn, yma moy ha moy a Gernewek displegyes a-der dro dhyn ni mis ha mis, bledhen ha bledhen. Lemmyn, goslowewgh orth an dowlen veur.