Towlennik #324 - Caradar, Obi-Oss, ha PanCeltic

Apr 21, 2017, 08:45 AM

An dowlen ma yw darlesys an seythen wosa an kesstrif Panceltic. Mes, ny yllyn ni ri dhywgh kedhlow war an sewyans drefen bos sonskrifys kyns an hwarvos. Byttegyns, ni a wra lenwel an dowlen gans ilow a’n hwegh bro geltek. Dres henna, Esther Johns re dhanvonas dhyn derivas dhyworth Breten Vyghan arta. Yma hi ow mires orth lies henlavar an vro na ha’ga threylya dhe Gernewek. Dell glewyn ni, yma Esther ow tyski meur ow tochya taves hag istori a Vreten Vyghan ha hi trigys ena. Nicholas Williams re wrug leverel dhyn hwedhlow Jenner ha Nance erbynn an prys ma. Lemmyn, ev a bes gans hwedhel bewnans Caradar. Martesen, ev o an den a wrug dalleth a-hys an hyns dhe Gernewek kewsys dasserghys. Ytho, Gwenton re dheuth ha’n bleujyow a dhiskwa aga liwyow hweg a-der dro dhyn ni. Ha pan welyn an tekter ma, ni a wor bos dew hwarvos hengovek a Gernow ow tos: Gool Feri Hellys hag Obi-Oss yn Lannwedhenek. A vedhowgh hwi ow mos dhedha? Lemmyn… goslowewgh orth an dowlen veur.