Towlennik #326 - Blew kott ha sewen dhe'n PanKeltek

Drog yw genev nag esa Towlennik y’n seythen yw passys. Yth esen vy tramor yn Iwerdhon ha res o dhymm pareusi diw dowlen dhe’n keth prys. Kynsa tra, res yw dhymm leverel “gwrys yn ta” dhe lies huni. An Grenaways a waynyas nessa le y’n kesstrif kanow PanKeltek yn Carlow, Iwerdhon. Stuart MacQuarrie a gemeras kynsa le rag seni krowd. Y fydh moy a gedhlow y’n dowlen veur. Nyns esen vy dhe’n PanKeltek. My eth dhe’n Neidín y’n soth-west. Aswonys yw an tyller dhe Sowsnegoryon avel ‘Kenmare’. Hemm yw treylyes dhyworth ‘penn mor’. Byttegyns, tus a lever ‘An Neidín’ yn Gwydhalek. Pur ogas yw an styr dhe Gernewek; An Neythyn. Yth esen vy ena gans kowetha. Ni eth a-derdro an ranndir ha gweles penndra neb yw henwys ‘Allihies’ dhe’n Sowsnegoryon. Nans yw termyn hir, Kernowyon eth ena ha palas kober. I a wrug drehevel jynnjiow, chiow ha chapel. Oll anedha yw gweladow y’n jydh hedhyw. Gwell hwath genev o gweles paloresow ow neyja ena. Res yw dhyn leverel ‘gwrys yn ta’ dhe Dee Harris. Hi re wrug treghi hy blew rag sevel arghans rag koweth. Meur a dus a wrug profya arghans rag gweles hy blew kotta dhe’n Bennseythen Gernewek. Steve Harris a wra derivas pella y’n dowlen veur. Lemmyn – goslowewgh orth an dowlen veur na.