Towlennik #297

This is a programme overview of RanG #297 in slowed down Cornish.

Script follows>>

An dowlen a wra mires orth gool Keltek yn Kernow nessa mis …ha dyski yn kever lovryjyon yn Europagans Nicholas Williams. Ni a dhalleth gans bardhonek redyes gans Bardh Meur Merv Davey hag ev ow seni y delyn. An gan yw yn kever Myghal Yosef an Gov. An keswel gans Merv diwettha y’n dowlen yw yn kever Lowender Peran. Yma ev ow leverel dhyn yn kever keskan yn Kernewek kepar ha’n proms. Kekeffrys ha henna, ev a wra meneges bos Changing Room ow seni kanow yn Kernewek ynwedh. Yma keswel koth gans Pawl Dunbar hag ev ow styrya fatel wrug ev treylya kan dhe Gernewek nans yw lies bledhen rag Kan Rag Kernow. Yma Nicholas Williams ow kewsel a-dro dhe lovryjyon an seythen ma. Yn- medh Nicholas: “Lovryjyon, po leprosy, o kleves kemmyn yn Europa y’n osow tremenys… ha molleth euthyk o. Yma an kleves owth assaltya lies part a’n korf ha dre reson na yll an den klav klewes y vesies, rag ensempel, i a vydh kellys tamm ha tamm dre glevesyans ha dre bystigow.” Ogas dhe worfenan dowlen, ni a vir orth Lyver Enep, po Facebook, yn unn vires orth pythow leverys yn Kernewek dres an seythen dremenys. Yn- mysk an ilow an seythen ma, yma Matt Blewett ow kana ‘An Vowes a Lulynn’. Y hyllir kavos an geryow yn lyvrigow dyllys gans Maga ha Kowethas an Yeth. Byttegyns, es yw konvedhes an linen ‘bennath benenes’. Oll an gwella bys y’n nessa seythen.