Towlennik #303 - Keskussulyans

Towlennik 303 Yth eson ni dhe Lys Kernow arta an seythen ma. Nans yw unn seythen Mebyon Kernow a synsas aga heskussulyans ena. Yth esa moy es deg person ha tri ugens dhe’n darvos. Konseler Loveday Jenkin a gowsas war desten a arghasans Governans dhe’n taves. Konseler Dick Cole a gewsis a-dro dhe Ger-nens. Ker-nens yw dew hanow gorrys war-barth: Kernow ha Dewnens. Yma hwans dhe’n Governans kesunya unn geverang yn Kernow Gledh gans unn geverang yn Dewnens… orth tu hons a Dhowr Tamar. Pol Hodge re ros argemmyn an seythen ma a-dro dhe Werth Lyvrow nessa mis… dy’ Sadorn seytegves a vis Du. Y hyllir mos di ha prena royow Nadelik orth pris isel dhe’n Gowsva yn Krestir, dhe Resrudh. Nicholas Williams a re dhyn devedhyans an ger ‘penneglos’ an seythen ma yn tavosow erel. Ev a styr bos devedhys dhyworth an ger ‘kador’ yn Latinek. Dres henna, ev a lever nag yw an ger ‘kador’ kevys y’n tekstow Kernewek… saw yn henwyn tyller. Ev a red dhyn unn ensampel gans an ger ‘chayr’. Byttegyns… devnydhya a wren y’gan taves pubdedhyek a’n jydh hedhyw an ger ‘kador’. Lemmyn, goslowewgh orth an dowlen veur.