Towlennik #315 - Mammyethow

Yma hwarvos nessa seythen neb a vydh a les dhe bub Kernewegor: Dydh Keswlasek Mammyethow. Restrys yw der UNESCO may hallo pubonan argemynna aga yethow teythyek aga honan. Govynnys yw pubonan dhe gemeres aga rann y’n ‘chalenj mim’. 21ves mis Hwevrer, res yw dhyn dyllo mimow dre Facebook, Twitter hag erel gans lavar y’gan taves ni. Kekeffrys ha henna, res yw dhyn usya an hashtaggys #memeML ha #Kernewek. Mar mynnowgh gul agas mim agas honan, yma towlen warlinen henwys www.memegenerator.net. Mim yw skeusen gans lavar neb yw darlesys dre vedia socyal. Martesen, ny vynnowgh gul agas mim agas honan. Byttegyns, mars yw gwelys genes neb mim war an desten ma, gwrewgh y gevranna mar pleg. Marthys gwell yw ‘kevranna’ ages ‘kara’. Mar mynnowgh godhvos moy, yma kedhlow dyllys war an folen Facebook Radyo an Gernewegva. Lemmyn, goslowewgh orth an dowlen veur.