Towlennik #321 - Henry Jenner

Nicholas Williams a wra hwedhla nessa rann an hwedhel bewnans Henry Jenner an seythen ma. Ev a dhalleth yn unn styrya pandr’a wrug hwarvos yn y vewnans wosa ev dhe dhemedhi Kitty Lee Rawlings yn mil eth kans seytek ha tri ugens. Kekeffrys, ev a lever fatel o va Jacobite ha fest erbynn an Gurun. Ev a veu presentyes dhe Vyghternes Victoria unweyth ha, dell hevel, nyns o hi pes da kewsel ganso awos ev dhe grysi hy bos myghternes erbynn an lagha. Mil naw kans peswardhek warn ugens hag ev a dheuth ha bos Katholik y’n diwettha bledhen y vewnans. Byttegyns, ev a veu ynkleudhys y’n korflan Eglos Uni dhe Lannanta. Jerry Sethir re beu owth oberi yn lel ynwedh. Ev re rekordyas ragon derivas ow tochya hwarvos Kernewek synsys dhe Borthkellys an mis ma. Kekeffrys ha henna, yma nowodhow a’n bys Keltek ganso. Omlowenhewgh… ha goslowewgh orth an dowlen veur lemmyn.